Suliffeqarfiit silaannarsuarmik kissatsitsisartunik mingutsitsinerat
2014-imi angerlarsimaffiit nukimmik atuinerannit silaannarsuarmik kissatsitsisartumik mingutsitsinerat mingutsitsinerup tamarmiusup 22 pct.-eraa. Suliffeqarfiit mingutsitsinerat mingutsitsinerup tamarmiusup 78 pct.-erivaat, takuuk titartagaq 3.1.
Titartagaq 3.1. Silaannarsuarmik kissatsitsisartunik suliffeqarfiit aamma angerlarsimaffiit mingutsitsinerat
Najoqqutaq: Naatsorsueqqissaartarfik
Nunalerineq, aalisarneq il.il. silaannarmik kissatsitsisartumik mingutserineq mingutserinerup tamarmiusup 24 pct.-eraa. Tassani mingutserineq aalisariutinit annerpaamik pisuuvoq.
2014-imi nukimmik imermillu pilersuineq mingutsitsinerup tamarmiusup 17 pct.-ianik mingutsitsisimavoq. Nukimmik imermillu pilersuineq innaallagiamik avataaniillu kissamik pilersuinerulluni.
Assartuineq angallassinerlu mingutsitsinerup tamarmiusup 17 pct.-ianik mingutsitsisimavoq. Suliffeqarfiit suliffeqarfinnik inunnillu kiffartuussisartut tamarmik tassani pineqarput. Tassunga ilaanngillat suliffeqarfiit inuit namminneq pigisaannik biilinik usisaatilinnik nalinginnaasunillu assartuutillit.